Acziun da naturalisaziun dalla vischnaunca Tujetsch per persunas Svizras
Biaras persunas habiteschan gia dapi onns sche buca decennis en nossa biala vischnaunca Tujetsch ch’ei daventada lur patria. Daco allura buca metter quei ner sin alv entras ina naturalisaziun?
La suprastonza communala ha decidiu da menar atras ina acziun da naturalisaziun gratuita per la populaziun Svizra da Tujetsch tenor art. 7 dalla lescha da burgheis naven dils 1 da mars 2021 entochen ils 31 d’uost 2021.
Cheusut ein las premissas ch’ein d’ademplir per obtener il dretg da burgheis da Tujetsch menziunadas e las taxas indicadas che seresultan a caschun d’ina naturalisaziun.
Premissas per persunas svizras
A persunas svizras ch’ein domiciliadas el mument cura ch’ellas inoltreschan las damondas da naturalisaziun dapi silmeins dus onns senza interrupziun ella vischnaunca da Tujetsch, sa vegnir condeciu ni garantiu il dretg da burgheis sche:
a) lur extract privat dil register penal svizzer cuntegn negin’inscripziun gravionta tenor gl’artechel 18 dall’ordinaziun tier la lescha davart il dretg da burgheis dil cantun Grischun (130.110);
b) ellas adempleschan lur obligaziuns finanzialas;
c) ellas retilan neginas prestaziuns socialas;
d) ellas han restitutiu eventuals susteniments socials dils davos diesch onns.
Taxas
Per persunas che han in liug da burgheis el cantun Grischun ei la naturalisaziun gratuita.
Per persunas che han il liug da burgheis ord il cantun Grischun incassescha il cantun, il qual che sto era controllar e conceder il dretg da burgheis cantunal, ina taxa da frs. 250.- per ina persuna singula ni ina pauschala per pliras persunas d’ina famiglia ella summa da frs. 325.-.
Vuleis Vus daventar burgheis/A da Tujetsch ed ademplis las premissas? Allura inoltrai Vossa damonda ensemen culs formulars ch’ein buca pli vegls che dus meins, all’administraziun communala Tujetsch.
Per damondas pertuccont ils formulars da naturalisaziun ni ulteriuras damondas stat Rafael Demont, responsabel per affars da naturalisaziun, bugen a disposiziun sut la nr. da telefon 081 920 47 83 ni per e-mail rafael.demont@tujetsch.ch.
Ei fagess plascher da beneventar Vus sco niev/nova burgheis/A da Tujetsch.
Cordials salids
Suprastonza communala Tujetsch