Iniziativa encunter il project per in surpassadi alla staziun da Sedrun
L’entschatta fenadur 2019 ha il comité d’iniziativa che secumpona da Maria Theresia Pally, Peter Hüssy, Adelina Hüssy, Alfred Schmid e Bruno Luchsinger inoltrau ina iniziativa encunter il project per in surpassadi alla staziun da Sedrun, il qual la Viafier Matterhorn Gotthard e la vischnaunca Tujetsch han elavurau communablamein. En tut ein 148 suttascripziuns valeivlas vegnidas inoltradas. L’inziativa pretenda (text dall’iniziativa):
Las persunas representadas sin la gliesta da suttascripziun aschuntada pretendan tenor art. 13 dalla constituziun communala da Tujetsch (dretg d’iniziativa) che la suprastonza communala convochescha immediat ina radunonza da vischnaunca. Tier quella radunonza da vischnaunca duei la suprastonza communala informar il pievel detagliadamein sur dil stan actual pertuccont la realisaziun dil surpassadi planisau tier la staziun da Sedrun sco era sur dallas consequenzas e pusseivladads en connex cun quei project. Denter auter duei era il concept da traffic d’autos e viandonts concernent la colligiaziun dalla nova pendiculara naven da Valtgeva si Cungieri e si Cuolm da Vi vegnir delucidaus. La radunonza da vischnaunca duei el medem mument saver decier, schebein ei duei vegnir realisau silla staziun da Sedrun in surpassadi ni in sutpassadi. Duessan ils presents a quella radunonza da vischnaunca decider che la vischnaunca duei realisar ensemen culla Matterhorn Gotthard Bahn (MGB) in sutpassadi, duei la suprastonza communala immediat vegnir incaricada d’instradar il necessari process politic.
Il project che preveda in surpassadi alla staziun da Sedrun, sin tal quella iniziativa sebasa, ei vegnius sistius. Actualmein elavurescha la Viafier Matterhorn Gotthard Bahn (MGB) in niev project per la staziun a Sedrun. Ei vegn examinau pliras variantas che prevedan in sutpassadi. La vischnaunca da Tujetsch vegn era involvada tier l’elavuraziun dil project. Ils documents dil niev project vegnan silsuenter mess ora public. Parallelmein vegn la suprastonza communala a redeger in concept che regla il traffic d’autos e viandonts pigl areal dalla staziun da Sedrun ed il quartier da Salins. Sin fundament da quella nova situaziun ei il comité d’iniziativa vegnius tier la conclusiun che l’iniziativa inoltrada sto buca vegnir tractada.
Suprastonza communala, november 2019