opera viva – Concert festiv dalla fin digl onn 2019
Ils concerts dalla fin digl onn dall’opera viva ein daventai ina biala tradiziun el decuors dils davos onns. Sut la bitgetta da Gion Gieri Tuor presentan il coro opera viva, la filarmonia opera viva sco era solistas e solists indigens ed internaziunals muments musicals dalla megliera classa. Uonn ha Gion Gieri Tuor schau inspirar dallas ovras d’Antonin Dvorak. In dils concerts ha liug dumengia, ils 29 da december 2019 allas 20.00 uras ella baselgia da s. Vigeli a Sedrun. Bigliets saveis Vus retrer alla cassa (entrada baselgia) ni empurstar tier: Surselva Turissem, Sursaissa (tel. 081 933 22 22, obersaxen@surselva.info). Ils bigliets empustai saveis Vus retrer alla cassa gest avon il concert.
Nova societad acziunara – Sedrun Disentis Tourismus SA
Las vischnauncas Tujetsch e Disentis/Mustér fundeschan ina nova organisaziun turistica ella fuorma d’ina societad acziunara, numnadamein la Sedrun Disentis Tourismus SA. La nova societad surpren il menaschi operativ dall’uniun Sedrun Mustér Turissem naven dall’entschatta schaner 2020. Sut il tetg dalla Sedrun Disentis Tourismus SA ei dunna Simona Barmettler, directura, ensemen cun siu team da lavur responsabla per igl entir menaschi operativ dalla destinaziun da turissem Sedrun/Mustér. Las vischnauncas Tujetsch e Mustér daventan acziunarias principalas dalla nova societad ed ein representadas el cussegl d’administraziun. Sur dall’ulteriura constituziun dil cussegl d’administraziun ed ulteriurs detagls el connex culla nova societad acziunara vegnan las duas vischnauncas ad informar pli tard.