Reavertura dils spurtegls dall’administraziun communala e digl uffeci da baghegiar
Ils spurtegls dall’administraziun communala e digl uffeci da baghegiar ei naven digl gliendisdis, ils 27 d’avrel 2020 puspei aviarts tenor las uras usitadas.
Abdicaziun dalla contabilista ed elecziun d’in successur
Karin Bär ha abdicau sia plazza sco contabilista tier l’administraziun communala silla fin digl onn 2020. Ella ei engaschada dapi igl onn 2015 sco contabilista. La suprastonza communala engrazia cordialmein ad ella per sia buna lavur ch’ella ha prestau per la vischnaunca. Pigl avegnir giavischa la suprastonza ad ella tut mo il bien, bia cletg, satisfacziun e buna sanadad.
Sco niev contabilist ei Claudio Cajacob (53 onns) da Cumpadials vegnius elegius. El lavura dapi biars onns ella sparta da finanzas e dispona d’ina profunda savida sin quei sectur. Sco anteriur commember dalla cumissiun da quen e gestiun (Vischnaunca Sumvitg) duront 9 onns, da quei treis onns sco president, enconuscha el era ils differents affars communals. El entscheiva sia plazza l’entschatta d’uost 2020. La suprastonza communala ei perschuadida da ver fatg ina buna elecziun e selegra sin ina buna collaboraziun cun Claudio Cajacob.