Midada naven dil logo tier igl uoppen
Dapi igl onn 2005 sepresenta la vischnaunca Tujetsch anoviars cul logo enconuschent (mira giusut). La suprastonza communala ha decidiu unanimamein a caschun dalla seduta dils 13 da fenadur 2020 d’introducir igl uoppen ufficial per la correspondenza da vischnaunca e la cumparsa anoviars. Consequentamein vegn il logo actual buca pli nezegiaus dils menaschis communals. Quella midada vegn a succeder naven digl 1. da settember 2020.
Il logo vegn nezegiaus dapi igl onn 2005.
Igl uoppen original ei staus en funcziun tochen igl onn 2005. Naven digl 1. da settember 2020 nezegia la vischnaunca puspei igl uoppen ufficial.
Process da digitalisaziun
L’administraziun communala introducescha actualmein tier tuts menaschis communals in program (software) digital per l’administraziun da contracts, dils protocols e dall’ulteriura correspondenza da vischnaunca. Quei program possibilitescha denter auter alla suprastonza communala, al cussegl da vischnaunca ed als uteriurs gremis communals da prender investa dallas actas dils differents affars politics sur ina plattafuorma digitala. Naven da miez october succeda l’introducziun dil program tier ils gremis. Pass per pass vegnan ils gremis naven dalla suprastonza communala tochen tier las differentas cumissiuns involvai en quei process digital ed era scolai davart las differentas pusseivladads ch’il niev program porscha.