Scamond da carrar sin las vias d’uaul e da funs
Ils 13 da mars 2015 ei il niev reglament per far diever dallas vias d’uaul e da funs vegnius approbaus entras la radunonza da vischnaunca. Igl atun 2014 ha la polizia cantunala dil Grischun medemamein approbau quella lescha. El decuors dil matg vegnan las vias d’uaul e da funs signalisadas. Il scamond ei dapi igl emprem da zercladur 2016 en disposiziun . Naven d’immediat astgan las vias vegnir carradas mo cun lubientscha da vischnaunca. Las cartas da legitimaziun digl onn, dil meins, dall’jamna sco era dil di san naven d’immediat vegnir cumpradas tier l’administraziun communala Tujetsch duront il temps da spurtegl.
Las cartas dil di san vegnir retratgas da tut temps, pia era ordeifer il temps da spurtegl. Avon l’entrada principala dalla tgèsa communala, gest sper las scaffas da brevs, stat in caum da survir sesez. Lien sesanflan tschun sorts cartas, per mintga raiun in’autra colur, e tastgas. Avon ch’in raiun vegn carraus sto la taxa da frs. 5.00 (per raiun) vegnir pagada. Per mintga raiun basegna ei pia in’atgna carta, la carta ei d’emplenir ora cumpleinamein! La part sut (cupon da controlla) ei da distaccar e metter ensemen cul daner blut ella tastga. La tastga serrada giu ei da deponer en scaffa da brevs dall’administraziun communala. La part sura (Vossa quittanza) ei da deponer bein veseivel davos la finiastra da frunt el vehichel.
En la vitrina dasperas ein las necessarias informaziuns e la lescha pendidas ora (mira fotos). La lescha sa vegnir cargada giu sut il link suandont:
www.tujetsch.ch
Tgi che cunterfa a quest reglament ni a prescripziuns e determinaziuns che sebasan sin quel, sa vegnir punius cun ina multa.
Per damondas stat l’administraziun communala sco era igl uffeci forestal bugen a disposiziun.
Uffeci forestal Tujetsch
Taxas
Carta dil di CHF 5.-
Carta dal’jamna CHF 10.-
Carta dil meins CHF 20.-
Carta digl onn CHF 50.-, mo per proprientaris da schischom