Midadas da persunal tier l’administraziun communala da Tujetsch
Paula Jacomet, menadra digl uffeci da baghegiar, ha abdicau sia plazza silla fin fenadur 2019. Petra Furrer, collaboratura tier l’administraziun communala, ha medemamein abdicau la plazza, quei silla fin digl onn 2019. La suprastonza communala engrazia cordialmein a Paula e Petra per la buna lavur prestada en favur da nossa vischnaunca. Pigl avegnir giavischa la suprastonza a vus tut mo il bien, bia cletg, satisfacziun e buna sanadad.
Sco specialist pigl uffeci da baghegiar ei Dumeni Cavegn vegnius elegius. Dumeni Cavegn ei oriunds da Tujetsch. El ha 52 onns e habitescha cun sia famiglia a Glion. El surpren in pensum da 60% sco specialist per fatgs da baghegiar (plazza da stab). Dumeni Cavegn ei inschignier forestal (ETH) e ha absolviu differentas scolaziuns, denter auter sil camp d’informatica e sil sectur dall’economia. Dapi entgins onns lavura Dumeni Cavegn sco interprendider (SilvaING). Sia interpresa porscha different survetschs, denter auter inventarisaziuns forestalas ni la creaziun da cartas da prighel. El dispona d’ina gronda experientscha quei che pertucca la direcziun da projects. Sper sia plazza a Tujetsch vegn el ad esser engaschaus vinavon en sia interpresa. Dumeni Cavegn entscheiva sia plazza sco specialist per fatgs da baghegiar l’entschatta uost 2019.
Sco niev collaboratur per l’administraziun communala ei Rafael Demont vegnius elegius. Signur Demont ha 39 onns e habitescha actualmein a Winterthur. El tuorna anavos en sia patria, a Trun, cura ch’el entscheiva sia plazza tier l’administraziun communala a Tujetsch. Rafael Demont lavura pil mument sco collaboratur tier gl’uffeci civil dil marcau da Dübendorf. Suenter gl’emprendissadi mercantil tier
l’administraziun communala a Trun, ha el luvrau en pliras administraziuns, denter auter era sco menader dalla controlla da habitonts tier l’administraziun dil marcau d’Illnau-Effretikon. Plinavon ha el absolviu differentas scolaziuns, denter auter sil sectur dalla controlla da habitonts sco era sil camp digl uffeci civil. Rafael Demont entscheiva sia plazza l’entschatta november 2019 e vegn medemamein a surprender la funcziun sco substitut dil menader center communal (vicecanzlist).
La suprastonza communala ei perschuadida da haver fatg duas bunas elecziuns e selegra sin ina buna collaboraziun cun Dumeni Cavegn e Rafael Demont. Nus giavischein ad els ina buna entschatta e bia satisfacziun en lur novs posts.
Sin fundament dallas midadas ha la direcziun communala reorganisau l’entira administraziun communala. Da niev ei Adrian Deragisch vegnius elegius ella direcziun communala. Simon Collenberg, menader center communal, surpren niev l’incumbensa sco superiur dils pedels e dil cau-serenera. En fatgs administrativs vegn Dumeni Cavegn sustenius entras la canzlia communala, damai ch’el lavura en in pensum parzial. Per quella lavur ei ina plazza parziala scretta ora actualmein ella Tuatschina. La nova organisaziun ei valeivla naven dall’entschatta fenadur 2019. Il niev organigram ei veseivels silla pagina d’internet dalla vischnaunca Tujetsch sut la suandonta adressa:
https://tujetsch.ch/administraziun-communala/organisaziun/
Suprastonza communala, zercladur 2019