Nova collaboratura tier l’administraziun communala da Tujetsch
La suprastonza communala ha elegiu Anja Caduff (27 onns), oriunda da Rueras, sco nova collaboratura per l’administraziun communala. Anja Caduff ha terminau igl emprendissadi mercantil gl’onn 2011 tier l’Arena da skis Sedrun-Andermatt. Dapi entgins onns eis ella engaschada tier l’interpresa Berther Bau und Industrie AG sco emploiada ell’administraziun. Anja Caduff entscheiva sia plazza miez october e vegn a luvrar en in pensum da 40% tier l’administraziun communala. Ella vegn ad esser primarmein responsabla per lavurs administrativas ed il survetsch da telefon tiegl Uffeci da baghegiar. Dasperas surpren ella in pensum da lavur da 60% el biro da turissem (Sedrun Mustér Turissem) a Sedrun.
La suprastonza communala ei perschuadida da haver fatg ina buna elecziun e selegra sin ina buna collaboraziun cun Anja Caduff. Nus giavischein ad ella ina buna entschatta e bia satisfacziun tier l’administraziun communala.
Novas uras da spurtegl tiegl Uffeci da baghegiar
Naven dils 5 d’uost 2019 ein ils responsabels digl Uffeci da baghegiar puspei contonschibels per telefon ni e-mail.
Naven d’immediat ein suandontas midadas previdas:
- Il spurtegl ei aviarts per in e scadin mintga gliendisdis naven dallas 10.00 uras entochen allas 12.00 uras.
- Gliendisdis, mardis ni venderdis eisi pusseivel da s’entupar cun Dumeni Cavegn, specialist, tier fatgs che basegnan ina seduta. In termin per ina tala seduta ei mintgin obligaus da far giu entgins dis avon per telefon ni per per e-mail (telefon: 081 920 47 84 / e-mail: info@tujetsch.ch).
- Mintgamai gliendisdis, mardis e venderdis ei il specialist directamein contonschibels per telefon (tel. 081 920 47 93).
Nova strategia per la Scola Sedrun
Gl’onn 2018 ha la suprastonza communala incaricau ina gruppa da lavur d’elavurar ina strategia per la Scola Sedrun pils proxims diesch onns. La gruppa da lavur ha fatg differentas lavurs en quei connex. Ella ha elaborau ina statistica dils scolars e dallas scolaras dil scalem ault pils proxims onns da scola entochen igl onn 2029/2030 sco era examinau la substanza digl entir baghetg da scola. Plinavon ha la gruppa da lavur valetau il cerchel scolastic, ils scolars e l’instrucziun sco era redegiu ina evaluaziun dils avantatgs e disavantatgs tier il scenari che preveda ina scola a Tujetsch senza in scalem superiur. Sin fundament dils resultats ord quellas examinaziuns ei ina strategia per la Scola Sedrun vegnida elavurada.
La finamira principala dalla strategia per la Scola Sedrun ei da mantener aschi ditg sco pusseivel la scola da Tujetsch cun tut sias partiziuns. La nova strategia preveda pigl avegnir pliras mesiras, denter auter tier l’infrastructura e la lavur publica sco era tier l’instrucziun. Medemamein duei la Scola Sedrun porscher novs survetschs sco per exempel cuors e scolaziuns.
La suprastonza communala sustegn cumpleinamein quella strategia ch’ei zun innovativa. La strategia vegn publicada cull’entschatta dil niev onn da scola 2019/2020 silla pagina d’internet dalla Scola Sedrun (https://www.scolasedrun.ch/).
Suprastonza communala, fenadur 2019