La Corporaziun da vischnauncas SanaSurselva lantschescha ensemen cun ils furniturs da prestaziuns medicinalas e da tgira ella Regiun Surselva e cun sustegn dalla fatschenta da cussegliaziun KPMG in project per scaffir ina reit da sanadad integrada en Surselva. Cun quei project visiunari ei la Regiun Surselva – suenter che la revisiun parziala dalla lescha per promover la tgira da malsauns ei ida en vigur igl 1. da schaner 2021 – ida novas vias el Cantun Grischun.
Il Cantun Grischun ha cun la revisiun parziala dalla lescha per promover la tgira da malsauns ch’ei ida en vigur igl 1. da schaner 2021 decidiu sco emprem cantun insumma da sustener reuniuns sut in tetg da furniturs da prestaziuns. L’enconuschientscha per quella lavur sebasa sin ina studia dalla KPMG e dalla Universitad da s. Gagl – ch’ei vegnida renconuschida internaziunalmein – davart ils resultats positivs d’ina regiun da sanadad integrada. La Regiun Surselva stat avon grondas sfidas el sectur da sanadad: la vegliadetgna dalla populaziun, la depopulaziun dils giuvenils va vinavon, il provediment da basa entras ils miedis da casa ei buca garantius e persunal qualificau ha adina pli pintgas perspectivas.
Entras la reit da sanadad vegnan las instituziuns el sectur da sanadad ad esser preparadas meglier per il futur e per la populaziun duei vegnir scaffiu ina purschida da sanadad che corrispunda a lur basegns. Per forzas da lavur giuvnas dat ei tuttavia novas pusseivladads da sesviluppar. «Sco regiun da piunier eis ei nossa finamira da contonscher ina reit da sanadad en la quala mintga actur sa far valer a moda optimala ses basegns en in process da tractament ed el qual il Spital regiunal Surselva gioga ina rolla impurtonta», precisescha Martina Beeli, la presidenta dalla SanaSurselva. Il project vegn accumpignaus dalla fatschenta da cussegliaziun KPMG e d’in comite da padrinadi regiunal – Diego Deplazes, Carmelia Maissen sco era Manfred Manser – e dil coordinatur da project Daniel Tuor.
Ensemen cun ca. 60 representants da furniturs da prestaziuns e dallas vischnauncas vegnan defini, entras ina retscherca online, intervestas persunalas e workshops, ils pilasters strategics che vegnan concretisai en singulas gruppas da lavur naven digl atun 2021 ad in plan detagliau per la realisaziun. «Per haver a liunga vesta structuras stabilas stuein nus integrar ils furniturs da prestaziuns, las vischnauncas e la populaziun e risguardar ils basegns da quels. Mo sche tuts traian vid la medema suga savein nus haver success», explichescha Marc-André Giger, menader dil mandat tier la KPMG. L’implementaziun dalla strategia elaborada succeda naven dil schaner 2022.
Integraziun dalla populaziun regiunala
La populaziun dalla Regiun Surselva ei envidada da s’exprimer entras ina retscherca online da 10 minutas entochen ils 10 d’avrel davart la situaziun actuala e futura dil provediment da sanadad en Surselva. Tuttas informaziuns anfleis Vus sin www.sanasurselva.ch. La gruppa da project selegra da Vossa participaziun.