Scola Sedrun
Suenter numerus onns ha Ursula Cadalbert decidiu d’abdicar siu engaschament sco scolasta da classa. Ella vegn aunc a restar engaschada en in pign pensum parzial naven dil proxim onn da scola. Duront siu temps da survetsch ha ella instruiu ina massa scolaras e scolars cun grond engaschi e passiun. La suprastonza communala engrazia ad ella per sia buna lavur sco persuna d’instrucziun e la loialitad demussada. Pigl avegnir giavischa la suprastonza communala ad ella bia cuntentientscha, cletg ed oravontut buna sanadad.
Sco gia enconuschent banduna era Gian-Reto Nufer la Scola Sedrun suenter otg onns. All’entschatta eis el staus engaschaus sco persuna d’instrucziun ed ils davos treis onns supplementarmein sco meinascola. La suprastonza communala engrazia ad el per sia buna lavur giavischond al el en sia nova plazza e privat tut mo il bien.
Menaschi tecnic
Suenter rodund 34 onns astga Alfons Hitz, mecanist e collaboratur dalla gruppa stradala gleiti guder sia beinmeritada pensiun. El ei aunc engaschaus tier il menaschi tecnic entochen la fin da december 2021. La suprastonza communala engrazia ad el per sia loialitad e la buna lavur duront quels massa onns. Pil futur giavischa la suprastonza communala ad el tut mo il bien, bia cuntentientscha ed oravontut buna sanadad.
Sco siu successur ei Adrian Schnoz da Segnas vegnius elegius. El ei dapi plirs onns engaschaus sco mecanist tier las pendicularas (Andermatt Sedrun Sport SA). Adrian entscheiva sia plazza sco mecanist e collaboratur dalla gruppa stradala cun l’entschatta november 2021.
Manteniment dils edifecis communals
Suenter 17 onns terminescha Pio Hendry siu engaschament tier la vischnaunca Tujetsch culla fin da zercladur 2021. El ei staus engaschaus all’entschatta eifer la gruppa forestala ed ils davos quater onns per gronda part sco pedel dalla halla plurivalenta Dulezi. Per sia loialitad e la buna lavur prestada engrazia la suprastonza communala ad el giavischond pigl avegnir bia cuntentientscha e tut mo il bien. Entochen che la gruppa da pedels ha anflau in/a successur/a, eis el sedeclaraus prompts da surprender certas lavurs da pedel ella halla plurivalenta Dulezi, engraziel.
Administraziun communala
Suenter dus onns ha Rafael Demont, collaboratur dall’administraziun communala abdicau sia plazza tier la vischnaunca Tujetsch cun la fin d’october 2021. El surpren ina nova plazza sco referendari digl Uffeci civil a Glion. Per sia buna lavur prestada engrazia la suprastonza communala giavischond ad el ina buna entschatta en sia nova plazza e pil futur tut mo il bien.
Sco siu successur ha la suprastonza communala elegiu Mauro Cavegn da Sedrun. El ha terminau siu emprendissadi mercantil tier las pendicularas (Andermatt Sedrun Sport SA) igl onn vargau e silsuenter absolviu il survetsch militaric. Mauro ha gia entschiet sia plazza l’entschatta zercladur. El ei engaschaus entochen la fin d’october en in pensum da 50% e silsuenter en in pensum cumplein. El vegn a surprender per gronda part las lavurs da Rafael Demont. Cheutier s’audan differents affars organisatorics, la coordinaziun da projects sco era lavurs administrativas per tuttas partiziuns.
Lavur cumina sin intschess da Tujetsch
Las davosas jamnas han pliras uniuns e gruppaziuns prestau lavur cumina sin intschess communal da Tujetsch. La suprastonza communala engrazia a tuts ch’ein s’engaschai el rom dalla lavur cumina. Cheusut ein pliras impressiuns dalla lavur cumina dil vischinadi da Rueras e dalla societad da musica Sedrun-Tujetsch illustradas.
Occurrenza d’informaziun – iniziativa davart la staziun da Sedrun ed il transport d’autos sur il Pass Alpsu
Mesjamna, ils 30 da zercladur 2021 allas 20.00 uras ha liug ina occurrenza d’informaziun ella halla da scola a Sedrun en connex cull’iniziativa “Spindrar la staziun a Sedrun ed il transport d’autos cul tren sur il Pass Alpsu”. Cordialmein envida la suprastonza communala.