Novas collaboraturas per l’administraziun communala
La suprastonza communala ha elegiu duas novas collaboraturas per l’administraziun communala.
Judith Decurtins (59 onns) da Sedrun surpren la funcziun sco contabilista en in pensum parzial da 80%. Ella lavura dapi biars onns ella sparta da finanzas e dispona d’ina profunda savida e da bia experientschas sin quei sectur. Actualmein lavura dunna Decurtins tier las pendicularas Andermatt-Sedrun Sport SA ella partiziun contabilitad.
Sarah Flury (24 onns) da Camischolas ei vegnida engaschada sco nova collaboratura per l’administraziun communala (100%). Ella ha terminau 2016 igl emprendissadi mercantil tier la Banca Raiffeisen Cadi a Mustér. Duront ils davos treis onns ha ella luvrau sco emploiada mercantila en in biro d’advocatura e notariat a Glion. Sarah Flury vegn denter auter a liquidar lavurs da secretariat e dil spurtegl. Ei sectracta cheu d’ina nova plazza ch’ei vegnida creada, damai che l’administraziun communala ha da ventscher pil mument ed egl avegnir dabia incumbensas e pendenzas.
Muort quella nova plazza seresultan midadas tier il spectrum da lavurs da Rafael Demont, substitut dil menader center communal. El surpren da niev ulteriuras incumbensas el rom da projects e lavurs per la suprastonza communala. Ultra da quei vegn el a segidar tier revisiuns da leschas ed a redeger concepts.
La suprastonza communala ei perschuadida da ver fatg duas bunas elecziuns e selegra sin ina buna collaboraziun cun Judith Decurtins e Sarah Flury. Ellas entscheivan lur novas plazzas l’entschatta december 2020.
Grond engraziament pigl engaschi duront las malauras dils 2 e 3 d’october 2020
Duront la notg dils 2 d’october 2020 sin sonda ils 3 d’october 2020 han las malauras caschunau considerabels donns ella summa da rodund frs. 400’000.00 sin territori communal. Per gronds donns han las bovas dalla Val Vallatscha e dalla Val Paluttas procurau. Quellas han devastau las vias d’uaul, las pastiras e la plazza da grillar a Milà sut Rueras. Dapi l’entschatta dallas mesiraziuns eisi aunc mai curdau tonta plievgia sur in spazi da 24 uras (145 mm/m2) a Tujetsch.
Duront quell fin d’jamna ein pliras persunas stadas en acziun. Cheutier s’audan il survetsch da segirtad, ils Pumpiers Sursassiala, corporaziuns d’aua ed interpresas da baghegiar. Denter auter han els giu da far liber tumbins, schubergiar vias sco era da canalisar dutgs che mavan surora. La suprastonza communala engrazia cordialmein ad in e scadin ch’ei segidaus duront las malauras en favur da nossa vischnaunca.
bova- Val Vallatscha bova- Uaul Cavorgia
Burcanets bova- datier dalla staziun da Tschamut
