Seduta digitala cul president communal e la giuventetgna tuatschina
Martin Cavegn, president communal envida la giuventetgna tuatschina ad ina seduta digitala che ha liug sonda, ils 28 da november 2020 allas 19.00 uras. Il president communal haveva planisau da menar atras ina seduta culla giuventetgna da Tujetsch ella sala Cristalla a Sedrun. La situaziun actuala el connex cul coronavirus lubescha buc ina seduta communabla.
Ord quei motiv ha il president communal decidiu d’organisar ina seduta digitala. Giuvnas e giuvens da Tujetsch ella vegliadetgna naven da 16 onns ensi ein cordialmein envidai alla seduta. La finamira principala dalla seduta ei in brat d’ideas e meinis. La seduta ha liug sonda, ils 28 da november 2020 allas 19.00 uras sur il suandont linc (program Zoom):
Datas per s’annunziar tier zoom:
Meeting-ID: 914 2784 3725
Kenncode: 4PTTcy
Las tractandas dalla seduta ein menziunadas cheusut:
- Beinvegni entras il president communal ed il president dalla Uniun da giuventetgna Tujetsch
- Meinis generals dalla giuventetgna
- Ideas dalla giuventetgna per projects etc.
- Decisiun sur da sedutas el futur
- Plaid final dil president communal
Il president communal spera sin ina gronda participaziun alla seduta e selegra gia uss sin interessantas discussiuns culla giuventetgna da Tujetsch.
Tier damondas el connex cul linc ed il program Zoom saveis vus bugen sedrizzar tier l’administraziun communala (tel. 081 920 47 81).
La sonda sera dils 28 da november 2020 naven dallas 18.00 uras essan nus era contonschibels per damondas (tel. 079 681 36 48).
Survetsch da survigilonza ed activitads ella Residenza Dulezi
Il cussegl d’administraziun dalla Residenza Dulezi SA selegra d’informar davart las novas.
Dapi ils 20 d’october 2020 ein Elvira Deplazes e Roswita Loretz sco substituta responsablas pil survetsch dalla survigilonza dils habitonts ch’ein secasai ella Residenza Dulezi. Duront ils luverdis ei mintgamai ina persuna presenta duront ina ura ella residenza ed era contonschibla per telefon sur in spazi da 5 uras. Elvira e Roswita cusseglian ils habitonts dalla Residenza Dulezi tier las differentas caussas dil mintgadi. Sin giavisch fa ina dad ellas mintga di ina viseta da controlla. Tenor basegns organiseschan ellas era differents survetschs, denter auter il post da schubergiar, in taxi, il coiffeur, il survetsch da podologia eav.
Sper las lavurs menziunadas planiseschan ed accumpognan Elvira e Roswita differentas activitads pils habitonts, aschia per exempel in suentermiezdi da films ni da giugs, ina ura da leger ni magari era ina excursiun.
Elvira Deplazes Roswita Loretz
Novas uras d’avertura ella deponia Prau Cumin
La suprastonza communala ha decidiu d’arver da niev la deponia Prau Cumin treis dis (tochen uss: 1 di) duront il temps d’unviern (november entochen avrel).
Las uras ein valeivlas naven dils 9 da november 2020.
Gievgia
16.00 uras – 17.30 uras
Venderdis
13.30 uras – 16.00 uras
Sonda
09.30 uras – 11.00 uras
Impurtontas informaziuns:
Cartun
Da niev san ils habitonts e hosps dar giu gratuitamein il cartun ella deponia Prau Cumin.
Sacs clarblaus per la rimnada dil plastic
Ils sacs clarblaus dalla Regiun Surselva ch’ein destinai per la rimnada dil plastic vegnan medemamein pri encunter gratuitamein ella deponia Prau Cumin.
Dapli informaziuns tier ils rumians da plastic che Vus saveis dismetter els sacs anfleis Vus silla suandonta pagina d’internet: http://www.regiun-surselva.ch/de/entsorgung/recycling/
Ils habitonts e hosps san cumprar quels sacs ellas stizuns localas (Denner, Coop).