Bus da clom enviers Mustér naven dils 01-03-2021
La sonda, ils 28 da november 2020 ha giu liug ina seduta denter il president communal e la giuventetgna da Tujetsch. La giuventetgna ha menziunau a caschun da quella seduta che la colligiaziun dil traffic public enviers Mustér seigi la damaun buca cuntenteivla. L’actuala purschida dil traffic public possibilitescha buca als giuvenils da contonscher ad uras il tren che parta allas 06.15 uras naven da Mustér enviers Cuera.
Sin fundament dils resuns dalla giuventetgna ha la suprastonza communala lantschau en concordanza cun la Viafier Matterhorn Gotthard ed igl Uffeci da traffic dil cantun Grischun in bus da clom per la populaziun da Tujetsch. Il bus da clom cursescha tenor il plan dalla Viafier Matterhorn Gotthard. Igl urari dil bus da clom ei cuntenius en questa Tuatschina.
In e scadin ha la pusseivladad da reservar in plaz el bus da clom sur ils canals digitals sms ni whatsapp (nr. da telefon: 079 681 76 23), quei mintgamai entochen la sera avon allas 22.00 uras. Suenter las 22.00 uras vegnan neginas reservaziuns pridas encunter.
La suprastonza communala spera che la nova purschida vegni nezegiada stediamein dils giuvenils sco era dall’ulteriura populaziun tuatschina.
Niev cau digl uffeci da baghegiar
Il cau digl uffeci da baghegiar Dumeni Cavegn ha abdicau sia plazza silla fin da mars 2021. La suprastonza communala engrazia ad el per sia buna lavur ch’el ha prestau en favur dalla vischnaunca da Tujetsch. Pil futur giavischa la suprastonza ad el tut mo il bien, bia cletg, satisfacziun e buna sanadad.
Sco successur ei Simon Caduff (33 onns) da Sedrun vegnius elegius. El entscheiva sia plazza l’entschatta zercladur 2021. Simon Caduff ha terminau ils emprendissadis sco electromontader ed electroplanisader e la scolaziun da “tecnicist hf electrotecnica”. El dispona d’ina vasta experientscha sil camp da baghegiar.
La suprastonza communala selegra sin ina buna collaboraziun cun Simon Caduff.