skip to Main Content
Vischnaunca Tujetsch, Via Alpsu 62, 7188 Sedrun 081 920 47 80 info(at)tujetsch.ch

Administraziun communala – Simona Giossi sco nova menadra pil center communal

Suenter rodund siat onns ha Simon Collenberg abdicau siu post sco menader dil center communal sin la fin mars 2023. El surpren naven dall’entschatta avrel 2023 in niev post sco menader dallas partiziuns survetschs/segirtad e substitut dil directur dall’administraziun communala tier la vischnaunca da Bassersdorf el cantun da Turitg. La suprastonza communala engrazia ad el per la buna lavur prestada duront ses onns da survetsch e giavischa ad el tut mo il bien per siu futur.

Sco sia successura ha la suprastonza communala elegiu Simona Giossi, oriunda da Rueras. Ella ha terminau igl onn 2013 il studi d’informaziun (bachelor) ella Scol’aulta specialisada FHGR a Cuera. Actualmein lavura ella sco menadra d’in team en la biblioteca Pestalozzi ad Oerlikon. Ella dispona denter auter dad experientschas da menar persunal e da collaborar en projects. La suprastonza engrazia a Simona Giossi per sia decisiun e giavischa ad ella en siu niev post bia plascher e cuntentientscha. Ella entscheiva sia plazza naven da miez fenadur 2023 cun in pensum da lavur da 80%.

La plazza dalla menadra dil center communal vegn da niev partida si en duas parts. Simona Giossi vegn ad esser responsabla pil suandont camp d’incumbensas: responsabla superiura dil center communal, organisaziun dall’administraziun communala cun tut las partiziuns, redacziun dils protocols e messadis dalla suprastonza communala e dalla radunonza da vischnaunca, la survigilonza dils collaboraturs, la survigilonza sur dalla contabilitad, dil rendaquen ed il preventiv sco era sur da tuttas lavurs administrativas. Medemamein vegn ella a surprender entginas lavurs pigl archiv communal en collaboraziun cun Tarcisi Hendry. Per l’ulteriura cumpart dallas incumbensas da questa plazza (susteniment tier l’elavuraziun dil preventiv e dil rendaquen, survigilonza dallas leschas e collaboraziun tier revisiuns da talas, administraziun dils contracts e survigilonza sur dils projects eav.) ei la suprastonza communala actualmein sin la tscherca d’in/a ulteriur collaboratur/a.

 

Menaschi tecnic – Maurizio Degonda, niev collaboratur

La fin schaner 2023 ha Maurizio Degonda entschiet sia nova plazza tier il menaschi tecnic. El ha 25 onns ed ei da mistregn miradur. Suenter igl emprendissadi eis el sescolaus vinavon sco cauluvrer miradur. Ils davos nov onns eis el staus engaschaus tier l’interpresa da baghegiar indigena Loretz SA, Sedrun. La suprastonza communala giavischa a Maurizio tut bien en sia nova plazza.

Back To Top