Resultats dalla seduta digitala culla giuventetgna tuatschina dils 28 da november 2020
Sonda, ils 28 da november 2020 ha giu liug ina seduta digitala denter il president communal e la giuventetgna da Tujetsch. En tut han 27 persunas fatg part alla seduta, la gronda part ella vegliadetgna denter 16 e 24 onns e plirs giuvenils naven da 25 onns ensi. Era la promotura dalla giuventegna Gabriela Cabalzar e commembers dalla suprastonza communala ein stai dalla partida.
Eifer la seduta han las giuvnas ed ils giuvens menziunau diversas propostas co far pli attractiv la vischnaunca Tujetsch sco era fatg attents sin lur giavischs. Ils pli impurtonts resultats dalla seduta ein explicai cheusut.
Colligiaziun dil traffic public: La colligiaziun dil traffic public naven da Sedrun tochen a Mustér ei buca optimala. Quella sto vegnir migliurada (cunzun la damaun).
Habitaziuns: Las habitaziuns a Tujetsch corrispundan buca als giavischs dalla giuventetgna. Per las giuvnas ed ils giuvens eisi ina sfida d’anflar ina habitaziun adequata e che vegn schada vi per in tscheins pagabel.
Plazzas d’emprendissadi: La giuventetgna propona da scaffir ulteriuras plazzas d’emprendissadi en vischnaunca, aschia ch’ella sa absolver igl emprendissadi a Tujetsch (per exempel plazzas d’emprendissadi sil sectur mercantil, plazzas d’emprendissadi ella hotellaria).
Homeoffice: La giuventetgna recamonda da sclarir, schebein ei fuss pusseivel da metter a disposiziun localitads, aschia ch’ils collaboraturs da certas interpresas han la pusseivladad da luvrar naven da Sedrun.
Local per la giuventetgna: Las giuvnas ed ils giuvens giavischan in ulteriur local da sentupada, nua ch’els san sentupar cun la giuventetgna dalla regiun.
Uss vegn la suprastonza communala ad examinar ils giavischs e las propostas dalla giuventetgna e presentar ils resultats a caschun dalla proxima seduta che ha liug la fin da mars 2021.
La suprastonza communala engrazia cordialmein als giuvens ed allas giuvnas ch’els han priu la peda e fatg part alla seduta dalla sonda vargada.
Decoraziun da Nadal a Tujetsch
La suprastonza communala engrazia ad in e scadin ch’embellescha sia habitaziun, casa ni auters edifecis cun decoraziun da Nadal. Quei procura per ina emperneivla atmosfera els vitgs da nossa vischnaunca duront il temps da Nadal e Daniev. Quell’atmosfera ei gest ussa duront quei temps ch’il coronavirus fatschenta pliras spartas fetg beinvegnida.