Rumida da neiv sin intschess communal
La fin d’jamna dils 5 e 6 da december 2020 ei rodund 1 meter neiv curdada a Tujetsch. Il menaschi tecnic ei aschia staus cunfrontaus cun dabia lavurs muort la massa neiv. Quei ha procurau per retardaments tier la rumida da certas vias e dils passapeis.
La rumida da neiv dalla via cantunala, dallas vias da quartier e dallas sendas el vitg entscheiva baul la damaun denter las 04.00 uras e las 05.00 uras. Per la rumida da neiv dalla via cantunala ei il cantun responsabels. Eifer ils vitgs ha la vischnaunca denton da dustar la neiv che vegn stuschada cul criec agl ur dalla via. La neiv vegn cargada sils camiuns e menada naven. Avon che quellas lavurs vegnan lantschadas, ston tuttas vias da quartier esser rumidas e bein carrablas. La rumida dallas vias da quartier sto succeder entochen sil pli tard allas 07.00 uras. En in proxim pass vegnan tuttas vias slargiadas ed en quei mument vegn era la panuglia agl ur dalla via e la neiv sils passapeis dustada. Gest tenor il quantum dalla neiv nova sa ei capitar ch’entginas lavurs s’entardan duront certs dis. Tier quellas lavurs s’audan il cargar la neiv sils camiuns ed allura era il slargiament dallas vias ed il dustar las panuglias agl ur dallas vias da quartier e sils passapeis. Da quels dis supplichescha la suprastonza communala ils vischins e las vischinas sco era ils hosps per capientscha. La suprastonza communala engrazia als collaboraturs dil menaschi tecnic ed a tuttas interpresas privatas per lur buna lavur. Els fan tut lur pusseivel per che las vias seigien adina beinspert rumidas.
Proxims pass – revisiun dalla constituziun communala
A caschun dalla votaziun consultativa all’urna dils 29 da november 2020 han 215 persunas votau per la varianta dall’organisaziun communala che cumpeglia la suprastonza communala, la radunonza da vischnaunca e la votaziun all’urna (varianta A). La varianta cun la suprastonza communala, il cussegl da vischnaunca e la votaziun all’urna (varianta B) ha obteniu sulettamein 118 vuschs. Sin fundament da quels clars resultats eisi uss previu d’elaborar ina constituziun communala per l’organisaziun communala che preveda la radunonza da vischnaunca (varianta A). Cheutras cumpeglia l’organisaziun communala buca pli in cussegl da vischnaunca suenter che la nova constituziun communala ei en vigur. La cumissiun preparatorica vegn a s’entupar el decuors dil schaner 2021 per fixar igl agir e las proximas lavurs.
Informaziuns davart las prescripziuns el connex cul coronavirus tier las purschidas turisticas
L’organisaziun turistica Sedrun Mustér Turissem ha creau ina pagina d’internet che cumpeglia las prescripziuns concernent il coronavirus ch’ein valeivlas tier las differentas purschidas turisticas (gastronomia, territoris da skis, hotellaria eav.): https://disentis-sedrun.graubuenden.ch/de/covid-19-informationsseite-fuer-disentis-sedrun.
Nova purschida – tegiettas da fiera
La sonda vargada, ils 12 da december 2020 ha giu liug ina pintga fiera da Nadal avon la Residenza Dulezi. Il comite d’organisaziun che secumpona da Pascal, Nicolette, Laura e Désirée ha saviu far diever per l’emprema gada dallas tegiettas da fiera. La fiera ha attratg dabia visitaders.
Pio Hendry, collaboratur communal, ha construiu en tut tschun da quellas tegiettas. Egl avegnir sa in e scadin che vul far diever dallas tegias da fiera s’annunziar tier Elvira Deplazes e Roswita Loretz (nr. da telefon: 076 404 92 70 / 079 631 63 54 ), responsablas per activitads tier la Residenza Dulezi. Ellas procuran che las tegias vegnien plazzadas els loghens giavischai e puspei allontanadas suenter las occurrenzas.
Quella purschida ei gratuita e duei animar persunas privatas, uniuns ed autras organisaziuns d’iniziar fieras ed autras activitads. La suprastonza communala spera che las tegias vegnien nezegiadas stediamein e ch’ei hagi aschia liug dapli activitads els vitgs.
