Iniziativa: “Spindrar la staziun a Sedrun ed il transport d’autos cul tren sur il Pass Alpsu”
Il comité d’iniziativa che secumpona da Peter Hüssy, Sedrun, Hans Jacomet, Sedrun, Rest Mathias Caduff, Rueras, Beatrix Graf-Monn, Sedrun e Maria Theresia Pally-Monn, Sedrun ha inoltrau ils 5 da fevrer 2021 l’iniziativa che pretenda da spindrar la staziun a Sedrun ed il transport d’autos cul tren sur il Pass Alpsu. Il text dall’iniziativa ei aschuntaus cheusut:
Ils sutsignai pretendan dalla suprastonza communala da Tujetsch il suandont:
La staziun da Sedrun sto vegnir sanada entochen igl onn 2023, aschia ch’ella corrispunda allas determinaziuns tenor la lescha davart l’egualitad da persunas cun impediments. Tenor l’informaziun dalla Viafier Matterhorn Gotthard dils 12 da schaner 2021 ha il Departament da traffic dalla Confederaziun en cunvegnientscha culs cantuns Grischun, Uri e Valeis decidiu da buca pli porscher il transport d’autos cul tren naven digl unviern 2023. Quella decisiun ei buca acceptabla e metta la regiun avon fatgs cumpleni. Igl ei buca pusseivel da cumpensar las sperditas economicas cun migliurar las purschidas el sectur dil traffic da persunas regiunal.
L’iniziativa pretenda che la suprastonza communala da Tujetsch fetschi tut il pusseivel per che l’ustria dalla staziun a Sedrun resti el liug sco oz e ch’il transport d’autos cun il tren naven da Sedrun sur il Pass Alpsu vegni offerius vinavon. La suprastonza communala ei obligada d’informar il pievel sur dil stan dil project a caschun d’ina radunonza da vischnaunca, quei sil pli tard entochen ils 30 da zercladur 2021.
En tut han 734 persunas suttascret l’iniziativa. 351 suttascripziuns ein valeivlas. Dallas 383 suttascripziuns buca valeivlas, setracta ei da 356 persunas senza domicil a Tujetsch. La suprastonza communala ha examinau l’iniziativa e fatg persenn che tala ei buca valeivla. Sin fundament da quei fatg ha ella en concordanza cul comité d’iniziativa decidiu da tractar quell’iniziativa sco ina petiziun.