Damonda da susteniment – branschas pertuccadas dallas prescripziuns relaschadas en connex cul coronavirus
A caschun dalla seduta dils 28 d’avrel 2021 ha il cussegl da vischnaunca concediu credits da sustegn per las suandontas branschas:
– casas da colonias
– hotellaria
– ustrias
– stizuns da sport ed ulteriuras stizuns (senza stizuns da victualias)
Dapli informaziuns en connex culs credits da sustegn anfleis Vus el messadi dils 28 d’avrel 2021 (p. 19-23) ch’ei accessibels sin la pagina d’internet https://tujetsch.ch/nossa-vischnaunca/messadis-dil-cussegl/. Las propostas indicadas silla pagina 23 dil messadi, ein vegnidas approbadas unanimamein dil cussegl da vischnaunca.
Las interpresas dallas branschas menziunadas han la pusseivladad d’inoltrar ina damonda da susteniment. Persuenter ein las interpresas pertuccadas obligadas da far diever dil formular ch’ei accessibels cheusut. Medemamein haveis Vus la pusseivladad da retrer quei formular al spurtegl.
Per l’examinaziun dallas damondas da susteniment vala la lescha dalla vischnaunca Tujetsch davart susteniments finanzials per interpresas pertuccadas dallas prescripziuns relaschadas en connex cul coronavirus sco era las indicaziuns approbadas (p. 23 dil messadi) entras il cussegl da vischnaunca a caschun dalla seduta dils 28 d’avrel 2021.
Las damondas da susteniment ein d’inoltrar cul formular indicau entochen venderdis, ils 4 da zercladur 2021 alla Suprastonza communala, Via Alpsu 62, 7188 Sedrun. Damondas che vegnan inoltradas suenter quei temps, vegnan buca risguardadas.