En duas jamnas astga Claudi Monn surdar la stamparia La Tuatschina en novs mauns. Ursina Vinzens surpren la stamparia naven dall’entschatta uost 2021.
All’entschatta ei Claudi staus engaschaus sco collaboratur tier l’anteriura Uniun da cura e traffic Sedrun-Tujetsch che haveva surpriu l’ediziun dil fegl ufficial La Tuatschina. Ils davos 25 onns ha el menau la stamparia sur sesez. Quei ha el fatg cun gronda premura e passiun. Per la vischnaunca, oravontut per l’administraziun communala ei la stamparia in impurtont partenari. La collaboraziun cun Claudi ei stada sur tut ils onns ora fetg buna e nuncumplicada. Claudi ei adina staus fetg surventscheivels e ha purschiu maun nua ch’el ha saviu. Era engaschis ordeifer il temps da lavur sco magari la fin d’jamna ha el bia gadas priu en cumpra per la vischnaunca. Quei per exempel per garantir la publicaziun dils texts ufficials ella proxima Tuatschina ni per che la spediziun dils rapports annuals sappi succeder ad uras.
Ina stamparia en Tgèsa communala ei da grond avantatg. Aschia ha l’administraziun grazia a Claudi numerusas gadas saviu adattar ni amplificar il davos mument publicaziuns ni texts per la proxima Tuatschina, strihar publicaziuns gia preparadas ni crear eifer in cuort temps fegls sgulonts. Quels paucs exempels demuossan l’eminenta impurtonza da quell’interpresa ord vesta dalla vischnaunca. La stamparia, la suletta ella Cadi, ei era da gronda muntada per las interpresas ed autras organisaziuns dalla regiun, per las qualas ella prepara denter auter fegls sgulonts, cudischets e rapports. Ton pli eisi fetg legreivel che la stamparia vegn menada vinavon.
La suprastonza communala e l’administraziun communala engrazian a Claudi Monn per sia grondiusa lavur duront ils davos decennis e la buna collaboraziun. Pigl avegnir giavischein nus a Ti tut mo il bien, bia cletg ed oravontut buna sanadad. Gauda uss Tia beinmeritada pensiun e lai ir bein cun Tei.
Ad Ursina Vinzens, la nova possessura dalla stamparia La Tuatschina giavischein nus ina buna entschatta ed in bien maun sco interprendidra. La suprastonza e l’administraziun selegran sin ina buna collaboraziun cun ella.
Martin Cavegn, president communal, ha surdau a Claudi Monn in regal sco segn d’engraziament.