Residenza Dulezi
La Residenza Dulezi ei ina casa da habitar cun totalmein 18 habitaziuns ed utilisaziuns supplementaras. Ella sesanfla el center da Sedrun vid la Via Alpsu. La Residenza Dulezi vegn gestiunada dalla Residenza Dulezi SA. L’acziunaria principala ei la Vischnaunca Tujetsch.
La Residenza Dulezi SA vul possibilitar als habitonts da Tujetsch e contuorn da passentar lur sera dalla veta en nossa vischnaunca.
Descripziun
La Residenza ha tschun alzadas. In› arcada nuninterrutta colligia il plaun d’entrada cul plazzal davon senza traffic.
La structura fundamentala dalla residenza ei sempla e surveseivla. Igl access agl edifici sesanfla sut l’arcada per la protecziun dall’aura. Ina scala aviarta ed in ascensur meinan allas abitaziuns en ils dus plauns sisum e sil plaun dalla terrassa. In atrium illuminau a moda naturala creescha ina relaziun denter ils plauns da habitar cun il plaun d’entrada. Sin il plaun d’entrada dalla residenza sesanfla, sper il menaschi da gastronomia public, in local communabel ed era il secretariat dalla banca Raiffeisen Cadi. La garascha sutterrana sco era il parcadi per velos en il 2 plaun sutteran ein destinai per ils habitonts dalla residenza sco era per affittaders externs fixs.
Plans da surfatscha dalla Residenza
Habitar
Las habitaziuns porschan in standard da construcziun adattau alla vegliadetgna, disponan d’ina cuschina moderna e d’in bogn senza barrieras. Ellas adempleschan las premissas per habitar individualmein ed independentamein ella vegliadetgna. Loggias cun veider da protecziun encunter il vent engrondeschan ils locals da habitar. Tut las unitads da habitar han ina ventilaziun controllada per il local da habitar. La calira per il sistem da scaldament da terren vegn retratga dalla reit d’anergia. Las habitaziuns ein buca mobigliadas.
Basa d’accumpignament
Ils affittaders e las affittadras prendan part alla basa d’accumpignament cun ina contribuziun fundamentala da frs. 50.00 per persuna. Quella cuntegn la presenza d’ina persuna d’accumpignament duront ils luverdis sco era la contonschibladad per telefon duront 5 uras . Autras purschidas da survetsch (schubergiar, procurar per resti, survetsch da spisas etc.) sin quen separau sa vegnir organisau tenor giavisch.
Criteris d’admissiun
La purschida sedrezza en emprema lingia a persunas ella vegliadetgna da pensiun, sesends ni oriunds dalla Vischnaunca Tujetsch. Allas affittadras ed ils affittaders vegn da principi premess la habilitad da menar independentamein il tenercasa. Cun las purschidas da survetsch supplementaras duei vegnir contonschiu che era persunas handicapadas cun in lev basegn da tgira possien restar en las habitaziuns. Prestaziuns da tgira vegnan fatgas entras Spitex Cadi tenor agen uorden da tariffas.
Contact
Residenza Dulezi SA
c/o Solida Treuhand & Immobilien AG
Via Alpsu 70
7188 Sedrun
+41 81 920 33 77
info@solida.swiss